U Hrvatskoj i svijetu se 4. svibnja, na dan zaštitnika vatrogasaca Sv. Florijana, obilježava Međunarodni dan vatrogasaca. Svim vatrogaskinjama i vatrogascima čestitamo njihov dan i zahvaljujemo im na požrtvovnosti i humanosti koju pokazuju i dokazuju svakim izlaskom na intervenciju.
U nastavku prenosimo tekst našeg kolumniste Aleksandra Horvata u kojem se dotaknuo upravo teme vatrogastva.
VATRU GASI, BRATA SPASI
Veliju da su ljudi, homo erektusi, pred pol miljona let, ili čak pred miljon, zmislili ognja. A zapraf je to bedastoča, kajti je ogenj bil i predi ali je ferceral sam po sebi. Dok je strela vudrila v šikarje, šikarje je zgorelo. Točka. A ovo kaj se veli da su naši pretki „zmislili”, znači samo da su se nafčili ognja deti na lanec. Napravili su ognjišče, mesto gde se kurilo. Reč ognjišče dojde od ogenj, od staroslavenskoga ognь, prek ruskoga ogón, poljskoga ogień, litavskoga ugnis, a se skupa z latinskoga ignis, kaj znači ogenj, vatra. Doduše, reč vatra pak je druga priča, kajti dojde z albanskoga voter, kaj pak znači ognjišče. Vezda dok smo se to nafčili moremo dale. Negda, v zdavnašnje čase, ljudi su delali kolibe od slame dreva, trstine i koječega drugoga kaj bi jih i zločesti vok z priče lefko spuhnul. Nutri su imeli ognjišča pak bi jim negda iskra skočila ili se žerjafka skoturnula i – ode hižica! Dok se to dogodi, onda ogenj postane ono kaj je bil predi čoveka ali i ostal do den denes. Pošast! Zato se i veli: Ogenj je dober sluga, ali hudi gospodar. Gda ognja pomali hraniš i držiš ga zaprtoga on te greje i sveti ti, se je v redu, al če dojde na vlast, vujde i počne žreti vse čega se prime.
Če sam več spomenul slugu i gospodara, spomenimo još koju spametnu vu svezi ognja: deti za koga roku v ogenj znači garanterati za njega. Dolevati olje na ogenj znači pogoršati ionak ne veselu situaciju. Gde ima dima ima i ognja govori da v semu kaj se govori more biti i nekaj istine. Igrati se z ognjem znači svesno iti v kakvu opasnu situaciju ili riskerati. Biti med dva ognje je dupla nevola, ili kak je negda v našemu kraju jen čovek rekel “Oj je voda, oj je pikeči drot! A kam ve?” Da riga ognja se veli sa besnoga, nezgodnoga i svadlivoga čoveka. Gdo se dima ne nadimi, te se ognja ne ogreje, stara poslovica da bez motike nema kruha, bez muke nema nauke, itd. I još bi dodal da vaditi kostanje z ognja vredi za ono dok moraš namesto nekoga drugoga fasovati kakvo grdo delo, a zmislim se i one izreke da je neko zagorel kak kaubojska tava, ali to nebum tumačil…
No da se vrnemo na temu. Ljudi su v jeno vreme zeznali da dežđ zgasi ognja, da se dežđ i ogenj ne trpiju. Gda su zmislili nekakve posode nafčili su se vgasiti ognja tak kaj su ga polejali z vodom. I tak je nastal prvi vatrogasec. Samo se još ni tak zval. I kak je kultura išla napri tak su se i stvari menjale, ljudi su se v svojim hižama i dvoriščima okružili z dobro gorečim stvarima, i dok je ogenj komu vušel, znal je pogotnuti celu vulicu. Če su ga zastavili – dobro, a če nisu – sam je stal dok je vse pogotnol. I onda su ljudi skontali da se moraju organizerati tak da čim žerjavka skoči, mom moraš imeti ekipu koja ognja zastavi, čim pre tim bole. Tak su nastali vatrogasci.
Pogledal sam si vrednu knigu kolege Kovačeka o vatrogastvu v Ludbregu, pak bu vama Ludbrežancima kaj ne volite čitati monografije vredilo znati da je po pitanju vatrogastva Ludbreg veliki kotač v Lepi naši. Kak je vrli kroničar zapisal, v 19. stoljeću, na sam blagdan Telova, 29. svibnja 1864. leta, po vulicama Ludbrega išla je telovska prošecija. Po tradiciji su dečki pocali z mužari. V blizini cirkve, z jenoga mužara je skočila iskra – kam drugam nego na slamnati kroh na kocu. Tak je počel požar v kojem je zgorel rečeni kotec, komad župnoga dvora s velikim delom župnoga arhiva, šezdeset hiži v centru grada, a onda i kroh jedne od zgradi ludbreškoga starog grada (kak veliju, na zgradi gde je denes gradska uprava). To je bil najvekši požar i veliko zlo v Ludbregu i baš zato je naše denešnje DVD jedno od najstareših v državi. Tri dni potlam požara, Ludbreg je dobil svoj Vatrogasni zbor, koji se potlam preformiraval i preslagaval, imel svoje peripetije, ali je zdržal. Vu ti lepi debeli knjigi je još puno toga zanimlivoga, pak da ja ne prepričavam – pravac knjižnica.
Vatrogastvo je od prenašanja vode kantu po kantu, tehnički napredovalo prek brentače do ručne pumpe na kolima ili špricalke koja je mogla z potoka ili drvenoga bednja vodu špricati na daleko, dale nego bi z kantom mogel zahititi Denes pak imaju vatrogasci te navalne kamijone, na motore i struju kaj špricaju kak se žarke strele. Nema tu ognju preveč prilike za pregovore. Vatrogasci bi mogli svoje kamijone zvati i obrambeni, on koji “brani” od ognja, ani ne – to je navalno vozilo! Te kamijon dok dojde i navali, ognju je ne sejeno. V Ludbregu je prva špricalka bila tam, kak velimo, “pri Frančiču“, gde je denes veliki rotor, more se videti na starim slikama, potlam su napravili drvenoga tornja.. A onda su imeli drugoga vatrogasnoga doma tu “na sred denešnje ceste“, pred denešnjom srednjom školom dok je tu bil velki plac. Te dom je imel zidanoga tornja. Vezda je najnoveši vatrogasni dom tam polek policije, z četiri prave garaže i se je kak treba.
V preteklosti su tornji na domu imeli nekakvu funkciju. Mogel bi na njemu biti stražar koji je nadaleko videl če se negdi kaj kadi. Če se jako kadelo, znači, neje roštiljada – uzbuna i gas. No denes je to odišlo v nove sfere. Imeli su jen čas onu sirenu, toga se zmislimo. Če je tulilo tri put po minutu, znači da je požar. Ko je bil dobrovolni vatrogasec, gde god je bil, dok je zatulilo, vse je ostavil i letel do vatrogasnoga doma. Najprvo su sirenu klačili ručno, onda su došle one na elektriku. V zadnje vreme za požar ne tuliju več. Jen čas su imeli one “pagere“ na hlačnjak obešene kaj su dobili obavest dok je požar, a ve je moderna mobitelna i sikakva drugačka komunikacija takva kaj čim nego javi da se v rajngli mast vužgala navalni kamijon več dela v leru, a komandni džip leti po cesti kam treba da vidi kakva je frka. Vatrogasci su na požaru v par minut.
Denes su vatrogasci itekak važen kotač v naši sakodnevici. Vatrogasci bi doduše, kak jim ime veli, trebali gasiti vatru. A kaj oni delaju? Se kaj treba. I to nažalost nevek dok je kakva frka. Najveseleši posel je valda spasiti maloga miceka z oreha. Se drugo je samo hudo. Gasiti ognja, spumpavati vodu dok je poplava, mekivati drevje koje veter zruši na ceste i hiže, rezati aute, kaj ljude zvadiju vun dok se veliki prometni umfal dogodi…
Se smo rekli v kratko o ognju i vatrogastvu, i da je denes se visoka tehnika i tehnologija, još par reči o ljudima. Krivo je misliti da su to samo zgodni dečki na kolendarima. Vatrogasec je denes idealna slika pravoga moža. Ničemu je ne strahu, razme se v posel, spreten je, jaki, kuražen, spašava živlenja i imetka, daje svoje vreme v sako doba dana i noči. I svoje živlenje negda dene v hudu situaciju i riskera. I još je dobrovoljec. Zato vatrogasce treba posluhnuti, ne kuriti bezveze gde se nesme i kaj se nesme, ne se igrati z ognjem i šibicami. Jer dok dva navalni kamijoni jen za drugim zatulju i zableščeju pun gas po vulici, tak kaj se obloki stepaju, maček vujde na vrt, a golubi z cirkve kompasa zgubiju, dlake ti se kostrešiju dok pomisliš da vu tem času celo nečije živlenje morti odhaja v dim, sekundu po sekundu. Da se razmemo, vatrogasci nesu “oni jeni ljudi kaj ti pred novo leto dojdeju prodati kolendara“ ili “oni kaj organiziraju vatrogasne zabave“ ili oni po kojima za grupni kipec velimo “idemo poslikati jenu vatrogasnu”. Oni su nekaj čistam drugoga i vekšega od toga. Kak ljudi, i oni su sigurno šalni i veseli, ali dok je ozbiljno onda jim se bole meknuti z puta. Pucama i dečkima vatrogascima zafalimo do neba za njihovu službu i sako dobro i sreču jim poželimo.
Kak je dragomu versoznancu Boži Hlastecu pred koji den bil stoti rođendan, evo v ramici i njegovih versov, kaj nas zmisliju zakaj nam vatrogasci trebaju. Saka čast i škrlak do poda. Vatru gasi, brata spasi!
A. Horvat, 1/2023.
